1398. Januar 27. Oppeln

In Gotes Namen Amen. Wir Bolko von gotes gnaden herczog czu Opol czu Falkinberg, vnde czu Strelicz, Tuen kunt vnde bekennen uffintlich allen den die desin brif sehen adir horen lesin, das vor vns komen ist vnde gestanden hat yn vnser keginwertikeit, die erbar frawe Benescha etwenne Petirs tachter von Zakraw, wolgesund leibes vnd der vornuft, mit wolbedochtem mute, vmbetwungen, mit frolichem antlicze, nicht vorleyt noch betrogen, sondir mit gutem freyen willen, vnd hat ufgegebin vnde vorreicht Miczken irem elichen wirte seynen nesten vnd nochkomelingen, alle ir erbe vnde gut das sie hat, vnd worczu sie hernochmols recht habin mag, vnde nemlich, was sie hat yn dem Dorfe czu Zakraw, vnd ouch uf dem gute Rudzina genant, vnd alle ire habe farnde vnd vnfarnde, wegelich vnd vnwegelich, was sie nu hat adir yn czukunftigen czeiten gewynnet, vnd mit allen czugehorungen, nuczczen vnd fruchten, wie man die mit sundirlichen namen vnde worten benennen mag, nichtes nicht awsgenomen, yn alle der masse, vnd mit deme rechte, als die egenante fraw Benescha das obgeschrebene erbe vnd gut czu Zakraw vnd ouch czur Rudzina selbir besessen hat, vnde vorczu sie recht gehaben mochte, vnd als is von iren eldirn ir an dirstorben vnd an sie komen ist, vnd als is yn seynen greniczen gelegen ist vnd vmbfanget hat, dem egenantin Miczken, seynen nestin vnd nochkomelingen, erplich vnd ewiclich czu besiczen czu halden gnyssen vnd fruchten, czu tuen vnd czulassen, czu vorkewfen adir czu vorseczen, vnd an seynen nucz czu wenden, wie is dem egenanten Miczken vnd seynen nestin allir nuczlichste seyn wirt, von vns vnd vnsern nochkomenden herczogen czu Opol vngehindirt. Des czu vrkunde haben wir vnser yngesegil an desin brif lassen hangen, der Gegeben ist czu Opol am nestin Sontage vor vnser liben frawen tag lichtewey, noch cristus geburt dreyczeenhundirt Jar dornoch als man schreibit yn dem acht vnd newnczigsten Jare. Dobey sind gewest vnsere liben getrawen, Lodwig von der Dobra, Jacusch von der Campe, Janke Gascholincz, Janek Chotulisky, Wilczke Kobuliczky, Jacusch von Sodilkowicz, vnde Jacobus Adalberti vnser Schreiber, deme desir brif was bevolen.

Mit anhangendem Siegel an einer Schnur von grüner und rother Seide; ein gekrönter Adler auf einem Helm, mit der Umschrift: sigillum. bolkonis. qvarti. ducis. opoliensis.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.